Sumqayıt sakinləri binanın bloklarında aparılan natamam təmir işlərindən narazıdırlar.
Sumqayit24.az-a şikayət ünvanlayan vətəndaşların sözlərinə görə, 17-ci mikrorayonda yerləşən 46 saylı binanın bloklarının təmiri üçün Mənzil Kommunal İstismar Sahəsinə rəsmi müraciət olunub.
Müraciətdən bir müddət sonra bloklarda təmir işlərinə başlanılıb, divarlar rənglənib. Lakin sakinlər bildirirlər ki, təmir yalnız kosmetik xarakter daşıyıb – divarlardakı çatlar, deşiklər və digər qüsurlar aradan qaldırılmayıb.
Sakinlərin iddiasına görə, məsələ ilə bağlı işçilərə irad bildirildikdə onlara "bizə verilən material ancaq bu qədərinə çatır, imkanımız olan hissəni təmir etmişik, qalanı bizim səlahiyyətimizdə deyil" cavabı verilib.
Vətəndaşlar hesab edirlər ki, bu cür yanaşma problemi kökündən həll etmir və aparılan işləri tam təmir adlandırmaq olmaz. Onlar aidiyyəti qurumlardan məsələyə ciddi yanaşılmasını və blokların normal vəziyyətə salınmasını xahiş edirlər.
