Sumqayıt sakinlərinin narazılığına səbəb olan yarımçıq tikili sökülsə də, ərazi baxımsız vəziyyətdə qalıb.
Sumqayit24.az bir müddət əvvəl Heydər Əliyev prospekti, 22-ci məhəllədə yaşıllıq sahəsinə gecə saatlarında beton tökülməsi və burada tikinti işlərinin aparılması ilə bağlı xəbər yayımlayıb. Sakinlər həmin vaxt ərazinin korlandığını və bunun şəhərin görünüşünə mənfi təsir göstərdiyini bildirirdilər.
Redaksiyamıza daxil olan yeni məlumata görə, ictimai narazılıq və məsələnin işıqlandırılmasından sonra ərazidəki yarımçıq tikili sökülüb. Lakin söküntüdən sonra tikinti qalıqları, beton parçaları və digər tullantılar olduğu kimi ərazidə saxlanılıb.
"Ərazi əvvəlkindən də pis vəziyyətdə qalıb. Yaşıllıq da bərpa olunmayıb", – deyə vətəndaşlar narazılıqlarını ifadə ediblər.
Onlar aidiyyəti qurumlardan ərazinin tam təmizlənməsini, tikinti qalıqlarının götürülməsini və yaşıllıq sahəsinin əvvəlki vəziyyətinə qaytarılmasını tələb edirlər.
