47 saylı Sumqayıt–Abşeron–Qaradağ seçki dairəsində treninqlər başlayıb. Sumqayıt24 bu haqda 13 avqust tarixində xəbər verir.
Gündə iki sessiya olaraq keçirilən üçgünlük təlimlərdə 41 məntəqədən 246 nəfər məntəqə seçki komissiyalarının sədr, katib və üzvünün iştirakı nəzərdə tutulub.
Mərkəzi Seçki Komissiyası (MSK) tərəfindən hazırlanmış slaydlardan və əyani vəsaitlərdən istifadə edilərək iştirakçılara səsvermə günü zəruri prosedur qaydalarından məlumat verilir.
Eyni zamanda, səsvermə günü məntəqə seçki komissiyaları üzvlərinin rol və vəzifələri, səsvermə otağının təşkili qaydası, seçki günü müşahidəçilərin hüquqları, hansı halda seçicinin səsvermə hüququndan istifadə edə bilməyəcəyi, səslərin hesablanması və sair məlumatlar da diqqətə çatdırılır.
Sonda iştirakçılara mövzu ilə bağlı yaddaş kitabçası təqdim edilir.
Qeyd edək ki, sentyabrın 1-də Azərbaycan Respublikasının Milli Məclisinə növbədənkənar seçkilər keçiriləcək.
