Dövlət İmtahan Mərkəzi (DİM) iyunun 21-də ümumi (9 illik) orta təhsil səviyyəsi üzrə təkrar imtahanlar təşkil edəcək.
Sumqayit24.az xəbər verir ki, imtahanlar Sumqayıt, Bakı şəhərlərində, habelə Abşeron rayonunda keçiriləcək. İmtahanda mayın 25-27-si tarixlərində qeydiyyatdan keçərək 9 illik təhsil bazasında kolleclərə qəbul müsabiqəsinə qoşulmaq istəyən abituriyentlər iştirak edə biləcəklər.
Bununla yanaşı, mayın 25-26-da təhsil aldıqları məktəblərə müraciət edən cari və əvvəlki illərin IX sinif şagirdləri də imtahana qatılmaq hüququ qazanıblar. İştirakçılar imtahana buraxılış vərəqələrini DİM-in müvafiq elektron xidmətləri vasitəsilə əldə edə bilərlər.
İmtahan saat 10:00-da başlayacaq. Buraxılış rejimi isə saat 09:45-də yekunlaşacaq və bu vaxtdan sonra gələn şəxslər imtahan binasına buraxılmayacaqlar. İştirakçıların rahat girişini təmin etmək məqsədilə buraxılış vərəqələrində onlar üçün fərdi giriş saatları da göstərilib.
