Sumqayıt şəhərində yerləşən stadionlardan birinin baxımsız vəziyyətdə olması ilə bağlı şikayət var.
Sumqayit24.az-a daxil olan məlumata görə, problem 18-ci mikrorayonda, Məhəmməd Əsədov küçəsində yerləşən stadionda müşahidə olunur.
Sakinlərin sözlərinə əsasən, uşaqlar boş vaxtlarını burada keçirmək və idmanla məşğul olmaq istəsələr də, stadionun yararsız vəziyyəti buna mane olur.
"Stadionun ətrafındakı qoruyucu tor hasarlar dağılıb. Xüsusilə oyun zamanı bu vəziyyət uşaqların hərəkətinə mane olur və əlavə təhlükə yaradır. Dağılmış yerlər yamaq vurularaq bərpa edilsə də, bu, maksimum bir ay davam edir, sonra yenidən sıradan çıxır.
Stadionda ot örtüyü yoxdur, uşaqlar asfalt üzərində oynamağa məcbur qalırlar. Bundan əlavə, futbol qapısı da yararsız vəziyyətdədir", - deyə sakinlər narahatlıqlarını ifadə ediblər.
Şikayətçilər aidiyyəti qurumlardan stadionda təmir-bərpa işlərinin aparılmasını və uşaqlar üçün təhlükəsiz şərait yaradılmasını xahiş edirlər.
