Nəqliyyat sıxlığının artması fonunda Bakı–Sumqayıt istiqaməti üzrə dəniz nəqliyyatının mümkünlüyü yenidən müzakirə mövzusuna çevrilib. Maraqlıdır, bu marşrut real alternativ ola bilərmi, yoxsa dəniz daşımaları yalnız nəzəri və turistik xarakter daşıyır?
Mövzu ilə bağlı Konkret.az-a açıqlama verən nəqliyyat məsələləri üzrə ekspert Rauf Ağamirzəyev bildirib ki, dəniz daşımaları birbaşa hava şəraitindən asılı olduğu üçün stabil nəqliyyat növü sayıla bilməz. Onun sözlərinə görə, bu qeyri-sabitlik daşımalarda fasilələr yaradacaq və nəticədə qiymətlərə, eləcə də ümumi effektivliyə mənfi təsir göstərəcək:
"Dəniz nəqliyyatı daima subsidiya tələb edəcək. Hətta bu subsidiyalar zamanla daha da artacaq. Çünki sürət aşağıdır və bu da sərnişinlər üçün zaman baxımından əlverişli deyil".
Ekspert qeyd edib ki, Bakı–Sumqayıt marşrutu üzrə dəniz yolu ilə hərəkət təxminən 5–7 saat çəkə bilər. Halbuki hazırda dəmir yolu ilə bu məsafəni 40 dəqiqəyə qət etmək mümkündür. Rauf Ağamirzəyevin fikrincə, əsas diqqət dəniz daşımalarına yox, mövcud quru nəqliyyatının təkmilləşdirilməsinə yönəldilməlidir:
"Dəmir yolunda sərnişin və yük trafikini ayırmaq, intensivliyi artırmaq lazımdır. Bakı–Sumqayıt dəmir yolu faktiki olaraq yerüstü metro kimi səhər saat 6-dan gecə 12-yə qədər, 15–20 dəqiqəlik intervalla işləməlidir".
Ekspert əlavə edib ki, dəniz nəqliyyatı yalnız mövsümi və turistik marşrutlar üçün uyğun ola bilər. Bu sahədə təşəbbüslər daha çox özəl biznes tərəfindən reallaşdırılar. Dövlət səviyyəsində isə prioritet yeraltı və yerüstü quru nəqliyyatının inkişafı olmalıdır.
