Sumqayıt şəhərinin 42-ci məhəlləsində antisanitar vəziyyət hökm sürür.
Sumqayit24.az-a daxil olan məlumata görə, sakinlərin "Qırmızı yataqxana" adlandırdığı əraziyə məişət və tikinti tullantıları atılır, nəticədə ərazi faktiki olaraq zibilxanaya çevrilib.
Sakinlər bildirirlər ki, tullantılar əsasən yaxınlıqda yaşayan və ya evlərində təmir işləri aparan şəxslər tərəfindən gətirilərək əraziyə atılır. Onların sözlərinə görə, yaxınlıqda yerləşən, uzun müddətdir baxımsız qalan peşə məktəbi binasının nəzarətsiz vəziyyətdə olması da bu problemin yaranmasına şərait yaradıb. İddia olunur ki, binanın ətrafının baxımsız və xarabalığı xatırladan vəziyyəti insanların həmin əraziyə zibil atmasını daha da artırır.
Şikayətçilər məsul şəxslərdən ərazinin nəzarətə götürülməsini və sakinlərdən daha məsuliyyətli olmağı xahiş edirlər.
