Bayram ərəfəsində şəhərlərin əsas məqsədi insanlara bayram ovqatı yaşatmaq, küçələri işıq, rəng və estetik görüntü ilə bəzəməkdir. Lakin görünən odur ki, Sumqayıtda bu anlayış tamam başqa cür başa düşülür. Şəhəri bəzəmək əvəzinə, sanki ictimai məkanları gözdən salmaq üçün xüsusi "yaradıcılıq" nümayiş etdirilir.
Belə ki, Sumqayıtın tam mərkəzində – Sülh prospektində yerləşən xiyabanda konus formasında sadə metalik bir fiqur quraşdırılıb. Üzərinə isə sayca az, görüntü baxımından isə heç nə ifadə etməyən işıqlar bərkidilib. Ortaya çıxan mənzərə nə bayramı xatırladır, nə Yeni ili, nə də şəhər mərkəzinə yaraşan hər hansı bir dekorasiyanı.
Fotonu çəkən sakin bildirib ki, bu fiqura "Yeni il küknarı" deməyə dili belə gəlmir. Çünki nə forma, nə dizayn, nə də ümumi görüntü bayram simvolu ilə uyğunluq təşkil edir. Əksinə, baxımsız, ucuz və tələm-tələsik qurulmuş bir metal konstruksiyanı xatırladır.
Sual yaranır: bu cür "bəzək" kimin zövqünə, hansı estetik anlayışa hesablanıb? Şəhərin mərkəzində, minlərlə insanın hər gün keçdiyi ərazidə bu cür yarıtmaz görüntü yaratmaq Sumqayıta hörmətsizlik deyilmi? Bayram əhval-ruhiyyəsi yaratmaq əvəzinə, insanların sosial şəbəkələrdə istehza və narazılıq etməsinə səbəb olan bu fiqur kimlər tərəfindən qəbul olunub?
İldən-ilə inkişafdan, abadlıqdan danışılan Sumqayıtda bayram dekorasiyalarının bu səviyyədə olması ciddi suallar doğurur. Əgər bəzəməyə zövq, düşüncə və məsuliyyət yoxdursa, bəlkə ümumiyyətlə heç nə quraşdırmamaq daha yaxşıdır?
