Sumqayıtlı məktəbli yüksək nailiyyətlərinə görə ali məktəbə müsabiqədənkənar qəbul hüququ qazanıb.
Sumqayit24.az xəbər verir ki, 23 nömrəli tam orta ümumtəhsil məktəbinin şagirdi Bəşirov Nəsir Bəşir oğlu təhsilini ADA Universitetinin "Kompüter elmləri" ixtisası üzrə davam etdirməyi planlaşdırır.
Məktəbli elm və texnologiya sahəsində qazandığı uğurlarla diqqət çəkir.
Nəsir hələ 6-cı sinifdə informatika fənni üzrə Respublika Fənn Müsabiqəsində bürünc medal qazanaraq uğur yoluna qədəm qoyub. 7-ci sinifdə isə fizika üzrə qızıl medal əldə edib.
O, 7-8-ci siniflərdə "Azercell Cup" proqramlaşdırma müsabiqəsində iştirak edərək bürünc və qızıl medallara layiq görülüb.
8-ci sinifdən etibarən Respublika Fənn Olimpiadalarında iştirak edən Nəsir 4 il ardıcıl olaraq yüksək nəticələr göstərib:
- 8-ci sinif - gümüş medal
- 9-cu sinif - qızıl medal
- 10-cu sinif - gümüş medal
- 11-ci sinif - qızıl medal
Eyni zamanda, İnnovasiya və Rəqəmsal İnkişaf Agentliyinin təşəbbüsü ilə keçirilən "İddia Cup" proqramlaşdırma müsabiqəsində gümüş medal qazanan Nəsir beynəlxalq arenada da uğurla çıxış edib. O, "Info 1 Cup" beynəlxalq proqramlaşdırma müsabiqəsində bürünc medal qazanıb, EJOI — Avropa Gənclər Olimpiadasında isə həvəsləndirici sertifikata layiq görülüb.
Nəsir Bəşirovu təbrik edir, gələcək fəaliyyətində uğurlar arzulayırıq!
