Məlum olduğu kimi, xüsusilə ali təhsil almış sumqayıtlı gənclərin əksəriyyəti iş üçün Bakıya üz tutur.
Bu da öz növbəsində müxtəlif problem və çətinliklərin yaranmasına səbəb olur. "Çörək pulu"na görə hər gün Bakıya gedib-gələn sumqayıtlılar vaxt və enerji itkisi yaşayırlar ki, bu da onların gündəlik həyatına və iş fəaliyyətinə təsir göstərir.
Sumqayıt sakinlərinin, xüsusilə də gənclərin şəhərdə qalaraq işləməsini və yaşayışını təşviq etmək üçün hansı addımlar atılmalıdır? Bu istiqamətdə dövlət, yerli icra strukturları və özəl sektor hansı tədbirləri həyata keçirməlidir?
Sumqayit24.az məsələ ilə bağlı deputat Elnarə Akimovanın fikirlərini öyrənib.
Millət vəkili bildirib ki, Sumqayıtdan Bakıya axının əsas səbəblərindən biri paytaxtda əmək bazarının daha geniş olması ilə bağlı formalaşmış təsəvvürdür.
"Lakin reallıq ondan ibarətdir ki, Sumqayıt bu gün Azərbaycanın ən böyük sənaye şəhəri olmaqla yanaşı, ölkənin ən iri istehsal və ixrac mərkəzlərindən birinə çevrilməkdədir.
Son illər şəhərdə həyata keçirilən sənayeləşmə siyasəti nəticəsində minlərlə yeni iş yeri yaradılıb. Sumqayıt artıq təkcə yaşayış şəhəri deyil, həm də ciddi məşğulluq imkanları təqdim edən iqtisadi mərkəz statusu qazanıb", - deyə deputat qeyd edib.
Elnarə Akimova əlavə edib ki, şəhərdə fəaliyyət göstərən sənaye müəssisələri və istehsal sahələrindəki vakansiyalar üzrə ilk növbədə Sumqayıt sakinlərinin işlə təmin olunmasına xüsusi diqqət yetirilməlidir:
"Çünki şəhərin iqtisadi inkişafından və yaradılan yeni imkanlardan ilk növbədə məhz Sumqayıt sakinləri faydalanmalıdır. Əsas məsələ mövcud imkanlarla gənclər arasında daha güclü əlaqənin qurulmasıdır. Ali məktəbi bitirən gənclərin bir hissəsi şəhərdə mövcud vakansiyalar, təcrübə proqramları və karyera imkanları barədə kifayət qədər məlumatlı olmur. Buna görə də sənaye müəssisələri ilə universitetlər arasında əməkdaşlığın genişləndirilməsi, ödənişli təcrübə proqramlarının artırılması və tələbələrin hələ təhsil dövründən istehsalat müəssisələrinə cəlb olunması vacibdir".
Deputat həmçinin dövlət, yerli icra strukturları və özəl sektorun bu istiqamətdə atmalı olduğu addımlara da toxunub.
"Dövlət və yerli icra strukturları isə yalnız iş yerlərinin yaradılması ilə kifayətlənməməli, şəhərin ümumi həyat keyfiyyətini də yüksəltməlidirlər. Müasir ictimai məkanların, parkların, gənclər mərkəzlərinin, innovasiya və startap hub-larının yaradılması Sumqayıtı daha cəlbedici edə bilər. Gənclər yalnız işləmək üçün deyil, həm də yaşamaq, inkişaf etmək və vaxt keçirmək üçün rahat mühit axtarırlar. Bu baxımdan rəqəmsal texnologiyalar, yaradıcı sənayelər və xidmət sektoru üzrə bizneslərin inkişafı da təşviq edilməlidir.
Özəl sektorun üzərinə düşən vəzifələrdən biri də rəqabətqabiliyyətli əməkhaqqı, karyera yüksəlişi imkanları və müasir korporativ mühit formalaşdırmaqdır. Əgər gənc mütəxəssis Sumqayıtda həm yaxşı maaş, həm peşəkar inkişaf, həm də keyfiyyətli şəhər mühiti tapa bilsə, Bakıya köçmək onun üçün zərurət olmayacaq", - deputat sonda vurğulayıb.
