Bakı-Sumqayıt yolunda vəziyyət getdikcə qəlizləşir. Sumqayıt24 bu barədə 14 avqust tarixində Bakupost.az-a istinadən xəbər verir.
Universitet və məktəblərdə yay tətilinin olmasına baxmayaraq, bu yolda sıxlıq azalmadı. İnsanlar yaranmış vəziyyətdən narahatdırlar.
Nəqliyyat eksperti Elməddin Muradlı məsələ ilə bağlı öz fikrini bölüşüb. Onun sözlərinə görə, gələcəkdə zərurət yaranarsa, hökumət maliyyə ayıra və Xırdalanda metro tikilə bilər:
“Amma müxtəlif istiqamətlərə yalnız bir yerdən gedən sürücülər ciddi problemlə üzləşirlər. Problem də ondan ibarətdir ki, başqa alternativ yol yoxdur. Hamı eyni yoldan istifadə etməli olur. Bakı kəndləri, qəsəbələr, Binəqədinin bir çox əraziləri var ki, onların ciddi yol problemi var”.
Ekspert ölkə başçısının göstərişi ilə yeni yol xəritəsinin hazırlandığını xatırladıb:
“Bu yolun tikintisinə də artıq başlanılıb. Ola bilsin ki, bir neçə ilə yolun tikintisi başa çatacaq. Amma dövlətin alternativ yollar çəkilərək, problemin aradan qaldırılması ilə bağlı da tapşırıqları var. Kənar dairəvi yolların birləşdirilməsi, Böyük Şor üzərindən yeni yolun çəkilməsi nəzərdə tutulur. Hətta Keşlə bazarı sökülmək üzrədir. Ordan da yeni yol keçəcək. Yəni bir çox alternativ yolların çəkilişinə başlanılıb”.
E. Muradlı Binəqədi şossesində hər gün tıxacların olduğunu bildirib:
“O ərazilərdə əsasən, qanunsuz tikililər var. İcra Hakimiyyətlərinə, bələdiyyələrə rüşvət verərək tikilən evlər yollarda sıxlıq yaradıb. Maklerlər puldan ötrü hər yola əl atıblar. Heç kim də gəlib deməyib ki, belə olmaz, bu qədər acgöz olma. Təsəvvür edin ki, evin qapısı birbaşa yola açılır və az qalır ki, adamı maşın vursun. O istiqamətdə də sıxlığın azadlıması üçün tədbirlərə ehtiyac var”.
