SDU-nun 60 illik yubileyinə həsr olunmuş Respublika elmi konfransı keçirilib. Sumqayıt24 bu barədə 18 noyabr tarixində Sumqayıt Dövlət Universitetinə istinadən xəbər verir.
Əvvəlcə rektor professor Elxan Hüseynov və təhsil ocağının bir qrup professor-müəllim heyəti Sumqayıtda ulu öndər Heydər Əliyevin abidəsini ziyarət edib, abidə önünə gül dəstələri qoyublar.
Tədbir iştirakçıları Sumqayıt Şəhidlər xiyabanı və şəhidlik zirvəsinə ucalan tələbə-məzunların xatirələrini əbədiləşdirmək üçün SDU-nun həyətində yaradılan abidə kompleksinə baş çəkiblər, şəhidlərimizin ruhlarını bir dəqiqəlik sükutla yad ediblər.
Daha sonra “Universitet elminin və təhsilinin müasir problemləri” mövzusuna həsr olunmuş konfrans onlayn formatda öz işinə başlayıb. Konfransda Azərbaycan universitetləri ilə yanaşı, dünyanın bir neçə ölkələrindən -Türkiyədən, Rusiyadan bir qrup alim iştirak edib. Toplantıda təhsilverənlər müxtəlif məruzələrlə çıxış ediblər.
Məruzəçilər qeyd ediblər ki, hazırda dünyada ali təhsilin vəziyyəti və perspektivləri barədə ciddi diskussiyalar aparılmaqdadır. Universitetlərimizin perspektiv inkişafını təmin etmək, elm və istehsalatla inteqrasiyanı sürətləndirmək üçün bir sıra tədbirlərin həyata keçirilməsi ali təhsil sahəsində islahatların daha səmərəli nəticə verməsinə bilavasitə öz müsbət təsirini göstərir.
Konfrans 9 bölmə üzrə işini iki gün ərzində davam etdirəcək.
