Hazırda ölkədə məşğul əhalinin 2 milyon 414 min nəfərini qadınlar, 2 milyon 615 min nəfərini isə kişilər təşkil edir. İşçi qüvvəsində qadınların sayı isə 2 milyon 571 min nəfərə çatır.
Sumqayit24.az xəbər verir ki, bunu deputat Vüqar Bayramov Milli Məclisin bugünkü plenar iclasında, Ailə, Qadın və Uşaq Problemləri üzrə Dövlət Komitəsinin 2025-ci il üzrə hesabatının müzakirəsi zamanı deyib.
O bildirib ki, hazırda ölkədə qadınların orta aylıq əməkhaqqısı kişilərin orta maaşının 69,1 faizinə bərabərdir:
"Qlobal miqyasda isə bu göstərici 77–80 faiz civarındadır. Qadınların ən çox çalışdığı sahə təhsil sektorudur. Əmək müqaviləsi ilə çalışan 722 min 147 qadından 242 min 801 nəfəri məhz bu sahədə fəaliyyət göstərir ki, bu da muzdlu qadın işçilərin 33,6 faizini təşkil edir.
Qadınların üstünlük verdiyi ikinci böyük sektor səhiyyə və sosial xidmətlər sahəsidir. Bu istiqamətdə 116 min 976 qadın çalışır və ümumi payda 16,2 faiz təşkil edir. İlk üçlüyü isə ticarət və nəqliyyat vasitələrinin təmiri sektoru tamamlayır. Bu sahədə 95 min 566 qadının əmək müqaviləsi qeydiyyata alınıb".
Deputatın sözlərinə görə, qadınların orta aylıq əməkhaqqısına görə ən yüksək göstərici mədənçıxarma sənayesində qeydə alınıb. Bu sahədə qadın işçilərin orta maaşı 2915 manatdır.
Digər sahələr üzrə statistika isə aşağıdakı kimidir:
Maliyyə və sığorta sektoru: 1813 manat;
İnformasiya və rabitə sektoru: 1353 manat;
Təhsil sektoru: 731 manat.
