Sumqayıtda prospektlərin birində yarımçıq qalmış təmir işləri narahatlıq doğurur.
Sumqayit24.az-a daxil olan məlumata görə, Koroğlu prospektinin 11-ci mikrorayondan keçən hissəsində yolda kanalizasiya problemi ilə əlaqədar müəyyən qazıntı işləri həyata keçirilmişdi.
Lakin görüntülərə əsasən demək olar ki, yol tam bərpa edilməyib və asfaltlanma işləri aparılmayıb.
"Hazırda ərazidə işlər bitib, amma yol hələ asfaltlanmayıb. Bu vəziyyət həm nəqliyyat vasitələrinin, həm də piyadaların hərəkətində ciddi çətinliklər yaradır", - deyə sakinlər narahatlığını ifadə edib.
Xatırladaq ki, redaksiyamız tərəfindən iyunun 10-da həmin ərazidə aparılan qazıntı işlərindən sonra ərazinin bərpa olunmaması və qazılmış sahələrin üstüaçıq vəziyyətdə qalması ilə bağlı şikayət dərc olunmuşdu.
