Corat qəsəbəsində ara küçələrin və məhəllədaxili yolların vəziyyəti sakinləri narahat edir.
Sumqayit24.az-a daxil olan məlumata görə, son illərdə qəsəbənin əsas yollarında asfaltlama və təmir işləri aparılsa da, bir çox ara küçələr hələ də baxımsız vəziyyətdə qalır.
Sakinlərin sözlərinə görə, yay aylarında torpaq örtüklü yolların yaratdığı güclü toz həm piyadalar, həm də ətrafda yaşayan insanlar üçün ciddi narahatlıq yaradır. Qış mövsümündə isə yağışlı havalarda küçələr palçığa çevrilir, nəticədə hərəkət etmək çətinləşir.
Qəsəbə sakinləri bildirirlər ki, əsas yollarla yanaşı, məhəllədaxili küçələrin də abadlaşdırılması nəqliyyatın və piyadaların hərəkətini asanlaşdırmaqla yanaşı, yaşayış şəraitinin yaxşılaşmasına da müsbət təsir göstərəcək.
Onlar aidiyyəti qurumlardan ara küçələrin asfaltlanmasını və problemin qısa müddətdə həll olunmasını xahiş edirlər.
