Azərbaycanda valideynlər meymunçiçəyinə görə məktəblərin onlayn təhsilə keçəcəyindən narahatdırlar.
Bizim.media xəbər verir ki, yeni tədris ilinin başlamasına az müddət qalıb və vətəndaşlar yeni pandemiyanın başlayacağından narahatdırlar.
Mövzu ilə bağlı Məktəbəqədər və Ümumi Təhsil üzrə Dövlət Agentliyinin Mətbuat Xidmətindən bildirilib ki, yeni tədris ilinə hazırlıq məqsədilə məktəblərdə müvafiq ixtisaslaşmış qurumlar tərəfindən dezinfeksiya işləri həyata keçirilir:
"Hər hansı bir xəstəliyə kütləvi yoluxma halı baş verdikdə, təhsil müəssisəsinin bağlanması, tədrisin distant formaya keçirilməsi ilə bağlı qərar digər aidiyyəti qurumlar tərəfindən verilir. Bildiririk ki, məktəblilər arasında hər hansı xəstəliyə yoluxma ilə bağlı statistik məlumatı aidiyyəti səhiyyə qurumu müəyyən edir.
Buna baxmayaraq, ənənəvi qaydada məktəblərdə müvafiq ehtimallar nəzərə alınaraq, pedaqoji kollektivə şagirdlərin səhhətində müşahidə oluna biləcək narahatlıq halları ilə bağlı daha diqqətli olmaları tövsiyə edilir”.
