16 yaşlı Mehdiabad qəsəbə sakini Səma Məhərrəmova itkin düşüb. Sumqayıt24 bu haqda 20 avqust tarixində Oxu.az-a istinadən xəbər verir.
Qızdan artıq 11 gündür ki, xəbər yoxdur. Səmanın atası Əsgər Məhərrəmov övladının itkin düşdüyü günü belə izah edib:
"Qızım avqustun 8-də səhər saat 7:25-də evdən çıxıb. Evdəki telefonla "Vasmoy" bazarına (8-ci kilometr Ticarət Mərkəzi) taksi sifariş verib. Telefonu evdə qoyub, özü ilə aparmayıb. Sadəcə, bazarı tanıyır, çünki oraya getmişik. Bazarda taksi sürücüsünün onu maşından düşürdüyünü kameradan izlədik. Orada bir nəfərdən onu Ukrayna dairəsinə aparmasını xahiş edib. Sonra həmin şəxs ona çips və su alıb. Qızım oturacaqda oturub onları yedikdən sonra mühafizəçidən "bura haradır?" deyə soruşub. Mühafizəçi izah edib və qızım Əhmədliyə tərəf gedib. Bundan sonrakı görüntüləri izləyə bilməmişik. Qızımın psixoloji problemləri yox idi və ailədə də münasibətlərimiz yaxşı idi. 10-cu sinfi yeni bitirmişdi".
Qeyd edək ki, yeniyetmə evdən çıxdıqdan sonra paytaxtın Nizami və Xətai rayonları ərazisində görülüb.
Daxili İşlər Nazirliyinin Mətbuat Xidmətindən bildirilib ki, Səma Əsgər qızı Məhərrəmovanın itkin düşməsi ilə bağlı axtarış elan olunub.
