"16 il Sumqayıt Dövlət Dram teatrında çalışmışam. Amma təəssüflər olsun ki, bəzi narazılıqlar oldu və mən qəlbən oradan inciyib uzaqlaşdım".
Bunu Bakı Uşaq və Gənclər teatrının aktrisası Əsmər Qurbanova moderator.az-a açıqlamasında deyib.
O daha sonra əlavə edib:
"Əslində 3-cü kursdan elə işə başlamışam. Sumqayıt Dövlət Dram teatrında ilk dəfə böyük səhnəyə çıxmışam. İndiyə qədər yadımdadır ki, "Tramvayı kim oğurladı?" tamaşasında dovşan obrazını oynayırdım. Daha sonra böyüklər üçün olan tamaşalarda da rol aldım. "Solğun çiçəklər"də Pəri, "Bayramın birinci günü" əsərində qulluqçu rolunu, "Bir köpək var idi" alleqorik əsərində dişi canavarı oynadım. Bu çox maraqlı bir obraz idi. Dişi canavar rolunun sənət həyatımda xüsusi rolu var. 16 il bu teatrda çalışmışam. Amma təəssüflər olsun ki, bəzi narazılıqlar oldu və mən qəlbən oradan inciyib uzaqlaşdım. 2 il Mingəçevir Dövlət Dram teatrında işlədim. Bu teatrda da istədiyim nəticə olmadığı üçün yarım qoyub getdim. Uzun müddət teatrdan küsdüm. Sənətdən uzaqlaşdım. 12 il səhnədən uzaq qaldım".
Əsmər Qurbanova bildirib ki, dəfələrlə Sumqayıt Dövlət Dram teatrından dəvət alsa da, getməyib:
"Sənət yoldaşlarım məni öz doğma teatrıma dəvət etsələr də, ora qayıtmadım. Heç istəmirdim. Çünki qəlbim qırılmışdı".
Aktrisa film həyatının bir o qədər də uğurlu olmadığını bildirib:
"Bəzi filmlərə zaman-zaman çəkilmişəm. Təxminən 13-14 il əvvəl. Həm serial, həm film, həm də sənədli filmlərdə rol almışam. Sonra sənətimdə fasilə oldu. Uzun müddət sənətdən ayrıldığım üçün film həyatım da bir o qədər rəngarəng olmadı. 3 ildir qayıtmışam səhnəyə. Bəzi rejissorların bundan xəbəri yoxdur, gənc rejissorlar da məni tanımır. Hələ ki, maraqlanmırlar. Əvvəl kastinq qrupları teatra gəlib, tamaşamıza baxıb, bizi film üçün oradan seçirdilər. İndi bu ənənə yoxdur. Çox arzu edərdim ki, rejissorlar gəlib teatrda tamaşalara baxsınlar. Teatrda istedadlı aktyor və aktrisalar çoxdur. Kastinq rəhbərlərinin heç onlardan xəbəri yoxdur. Bütün aktyorlar kimi mən də çəkilməyi istəyirəm. Sadəcə çağırmırlar. Mən də gedib heç kimə ağız açıb, xahiş etmərəm. Bu mənlik deyil. Sənətimi bəyənən gəlib məni çəkəcək".
