Sumqayıtda lükdə yaranan vəziyyət sakinlərin ciddi narazılığına səbəb olub.
Sumqayit24.az-a daxil olan məlumata görə, şəhərin Qurban Səid küçəsində kanalizasiya lükü çöküb. Təhlükənin qarşısını almaq məqsədilə əraziyə diqqət çəkmək üçün çökən yerə təkər qoyulub, içərisinə isə daş yerləşdirilib.
Yerli sakinlərin sözlərinə görə, problem uzun müddətdir mövcuddur və gecə saatlarında ərazidən keçənlər üçün ciddi təhlükə yaradır:
"Çoxdandır burada vəziyyət belədir. Gecə vaxtı ərazidən keçənlər daşa ilişib xəsarət alıblar. Xüsusilə uşaqlar, yaşlılar və nəqliyyat vasitələri üçün hərəkət xeyli çətinləşib".
Sakinlər aidiyyəti qurumlardan yaranmış problemin operativ şəkildə aradan qaldırılmasını tələb edirlər.
