Sumqayıtda növbəti avtobus dayanacağı problemi narazılıq yaradıb.
Sumqayit24.az-a daxil olan məlumata görə, Bulvar küçəsində avtobus dayanacağına aid nişanlar mövcud olsa da, yolun hər iki istiqamətində dayanacaq quraşdırılmayıb.
Şikayətçilərin sözlərinə görə, mövcud vəziyyət xüsusilə soyuq və yağıntılı hava şəraitində vətəndaşların gündəlik gediş-gəlişinə mənfi təsir göstərir.
"Qış fəsli olduğunu da nəzərə alsaq, dayanacaq olmaması xüsusilə yaşlılar və uşaqlar üçün çətinlik yaradır. Əlacsızlıqdan avtobus gələnə qədər yaxınlıqdakı marketdə gözləməli oluruq", – deyə şəhər sakini bildirib.
Vətəndaşlar müvafiq qurumlardan sözügedən ərazidə avtobus dayanacağının təşkil edilməsini tələb edirlər.
Xatırladaq ki, yanvarın 21-də redaksiyamız tərəfindən Koroğlu küçəsində, 5 nömrəli marşrut avtobusunun hərəkət etdiyi istiqamətdə də dayanacağın olmaması ilə bağlı şikayət işıqlandırılıb.
