Bu gün Azərbaycanın Milli Qəhrəmanı Polad Həşimovun doğum günüdür.
Sumqayit24.az xəbər verir ki, Polad İsrayıl oğlu Həşimov 1975-ci il yanvarın 2-də Qəbələ rayonunun Vəndam kəndində anadan olub. 1976-cı ildə Həşimovlar ailəsi Sumqayıt şəhərinə köçüb. Orta təhsilini Sumqayıt şəhərində əvvəlcə 28 nömrəli, sonra isə 34 nömrəli məktəbdə alıb.
P.Həşimov 2016-cı ilin aprel döyüşlərində iştirak edib və o, 2-4 apreldə baş verən hərbi əməliyyatlar zamanı Talış qəsəbəsi uğrunda gedən döyüşləri aparan 1-ci Ordu Korpusunun Qərargah rəisi olub və yaralanıb. 2019-cu il iyunun 25-də isə Polad Həşimova "general-mayor" ali hərbi rütbəsi verilib.
General-mayor P.Həşimov 2020-ci il iyulun 14-də Tovuz istiqamətində baş verən şiddətli döyüşlər zamanı qəhrəmancasına şəhid olub və iyulun 15-də II Fəxri xiyabanda dəfn olunub.
Azərbaycanın ərazi bütövlüyünün bərpa edilməsində xüsusi xidmətlərinə və döyüş tapşırıqlarını yerinə yetirən zaman göstərdiyi igidliyə görə Prezident İlham Əliyevin 9 dekabr 2020-ci il tarixli Sərəncamı ilə ona "Azərbaycanın Milli Qəhrəmanı" adı verilib.
Qeyd edək ki, Polad Həşimovun Davud və Teymur adında oğulları, Aybəniz adında qızı yadigar qalıb.
