Novxanıda qrunt və çirkab suları fərdi yaşayış evlərinin həyətlərinə axır. Bu haqda 28 mart tarixində Sumqayıt24 Xezerxeber.az-a istinadən məlumat verir.
Vəziyyət Bağlar yaşayış massivində yaranıb. Sakinlər iddia edirlər ki, duz gölü ətrafında, Saraydan Novxanı istiqamətində magistral yol çəkilir. Yol çəkilərkən sakinlərin evləri nəzərə alınmayıb. Yük maşınları ilə ərazidə böyük torpaq qatı yaradılıb. Sakinlərin yolu bağlanıb və qrunt sularının axıdılması üçün lazım olan drenaj ləğv edilib. Nəticədə sular həyətlərə, evlərin zirzəmilərinə dolur.
Şikayətçilərin sözlərinə görə, əvvəl qrunt suları yaxınlıqdakı gölə axıdılırmış, amma indi əraziyə daşınan torpaq buna imkan vermir.
Məsələ ilə bağlı Azərbaycan Avtomobil Yolları Dövlət Agentliyindən (AAYDA) bildirilib ki, ərazidə işi podraçı şirkət həyata keçirir. Amma həmin ünvandan adıçəkilən quruma heç bir müraciət daxil olmayıb. Əgər sakinlər müraciət edərlərsə, yaranmış problemin aradan qaldırılması istiqamətində müvafiq addımlar atıla bilər.
