Bu gün Azərbaycanın Milli Qəhrəmanı, Birinci Qarabağ müharibəsi şəhidi Natiq Qasımovun doğum günüdür.
Sumqayit24.az xəbər verir ki, Natiq Qasımov 1971-ci il yanvarın 2-də Gədəbəy rayonu, Kiçik Qaramurad kəndində anadan olub.
O, 12 mart 1992-ci ildə Xocalı rayonu Pirlər (Xramort) kəndi istiqamətində gedən döyüşdə Ermənistan hərbçiləri tərəfindən əsir götürülüb.
Onun sonrakı taleyi barədə dəqiq məlumatlar yoxdur.
Belə ki, Natiq Qasımov Xocalı rayonu Pirlər kəndi yaxınlığında yüksəklikdə yerləşən Alban kilsəsindəki mövqedə 5 gün təkbaşına erməni terrorçulara müqavimət göstərərək yüksəkliyi onlara verməyib. Gülləsi bitdikdən sonra əsir düşən Natiqin qəhrəmanlığı barədə filmlər çəkilib. Qeyd edək ki, Sumqayıt Dövlət Dram Teatrı yazıçı Elşən Sərxanoğlunun eyniadlı əsəri əsasında səhnələşdirilən "Ölməz" monotamaşası hazırlayıb. Tamaşada Milli Qəhrəman Natiq Qasımovun igidliyi, vətənpərvərliyi və fədakarlığı səhnə təcəssümünü tapıb.
Prezident İlham Əliyevin 2024-cü ilin iyunun 2-də imzaladığı Sərəncama əsasən Natiq Qasımova Milli Qəhrəman adı verilib.
