Sumqayıt şəhərində son günlər qaz təchizatında yaranan problemlər sakinləri boğaza yığıb.
Sumqayit24.az-a daxil olan çoxsaylı şikayətlərə əsasən, şəhərin müxtəlif ərazilərində - 4-cü, 8-ci və 9-cu mikrorayonlarında, eləcə də İnşaatçılar qəsəbəsinin Fərman Cəfərov küçəsində mavi yanacağın verilişində ciddi problemlər müşahidə olunur.
Vətəndaşların məlumatına əsasən, bəzi hallarda qaz ümumiyyətlə kəsilir, digər hallarda isə təzyiqin həddindən artıq aşağı olması normal istifadəyə imkan vermir.
"Qışın soyuq çağında qaz problemi yaşamaqdan bezmişik. Nə yemək bişirə bilirik, nə də evimizi qızdıra. Bu problemə niyə birdəfəlik çarə tapılmır?",- deyə yerli sakinlər bildiriblər.
Vətəndaşlar aidiyyəti qurumlardan məsələyə operativ şəkildə müdaxilə olunmasını və problemin tezliklə aradan qaldırılmasını tələb edirlər.
Sözügedən məsələ ilə bağlı "Azəriqaz" İstehsalat Birliyinin mətbuat xidmətindən Sumqayit24.az-a bildirilib ki, bəzi ərazilərdə lokal xarakterli qaz təzyiqi problemləri müşahidə oluna bilər.
Məlumata görə, bu cür hallarda abonentlərin müraciətləri və əməkdaşların apardıqları müşahidələr əsasında problemlər operativ şəkildə aradan qaldırılır.
Qurum onu da qeyd edib ki, qazın kəsilməsi qurumun fəaliyyəti ilə bağlı olmaya bilər.
"Məsələn, nəqliyyat vasitələrinin qaz boru xətlərinə çırpılması nəticəsində qazın məcburi dayandırılması halları baş verir. Eyni zamanda istismar olunan boru xətlərində sızmalar aşkar edildikdə, təhlükəsizlik məqsədilə qaz təchizatı müvəqqəti olaraq dayandırılır", - deyə məlumatda vurğulanıb.
