Sumqayıtın bir çox yerində səkilər standartlara uyğun deyil. Sumqayıt24 bu barədə 7 iyun tarixində Xeberle.com-a istinadən xəbər verir.
Memar-dizayner Aysel Hüseynova səki mövzusunun nəinki Sumqayıt, hətta Bakıda qlobal problemlərdən biri olduğunu deyir:
“Səkilər qurulan zaman tək sağlam insanlar deyil, eyni zamanda əlillər də nəzərə alınmalıdır və səkidə pandus olmalıdır. İkinci məsələ isə səkilərin hündürlüyüdür. Səkilərin hündürlüyünü normalda 12-15 sm kimi götürə bilərik. Bizdə isə hündürlük fərqləri var: bir tərəfdə 12 sm-dirsə, digər tərəfdə 30-35 sm-dək qalxır. Bu isə yaşlılar və uşaqlar üçün böyük maneə deməkdir. Üçüncü məsələ isə ondan ibarətdir ki, binaların sıfır xəttindən önə hər hansı pillələr salınır, ictimai iaşə obyektlərində sonradan süni şəkildə pillələr çıxarılır və ya açıq kafe kimi istifadə edilir”.
O bildrib ki, ən əsas məsələ sonradan salınmış səkinin tam mərkəzində yaşıllıq salınmasıdır. Ağacı görən piyada avtomobil yoluna düşüb, yenidən səkiyə qalxmalı olur. Bu isə təhlükə yaradır:
“Əlillər də nəzərə allnmalıdırlar. Pandus ya yoxdur, olanda isə elə bucaq altında qoyulur ki, normal insan belə keçsə, yıxılar. O da qaldı əlil arabasında olan insanlar. Eyni zamanda elə küçələr var ki, səkilər davam edir, sonda hər hansı bir divara söykənir, ondan sonra səki olmur. Vətəndaş məcburdur düşüb əsas yolla piyada gedib yenidən səkiyə çıxsın. Bu kimi hallar, əsasən, qanunsuz tikililər, sonradan qarşıya maneələr çıxarılan zaman yaranır. Belə qanunsuz tikililər sökülsə, digərləri eyni şeyi təkrarlamaz. Bu məsələyə şəhərsalama və memarlıq işlərinə məsul olan qurumlar daha ciddi yanaşmalıdır. Şəhər qurulan zaman ən önəmli faktor insan faktoru olmalıdır. Şəhər hər təbəqədən olan insanlar nəzərə alınaraq memarlıq standartlarına uyğun qurulmalıdır”.
Sumqayıt Şəhər İcra Hakimiyyətinin sözcüsü Eyvaz Qocayevin sözlərinə görə, bu il Koroğlu və Azərbaycan prospektlərində, Zülfü Hacıyev, Üzeyir Hacıbəyov, Ağa Quliyev, Niyazi, Bədəlbəyli, 20 Yanvar, Zamin Hüseynov, Ərşad Kərimov, Kamran Hüseynov, Mehdi Hüseynzadə küçələrində, eləcə də bəzi mikrorayonların daxilində səkilərin təmir olunması nəzərdə tutulub.
