Bu gün sumqayıtlı şəhidlərin anım günüdür.
Sumqayit24.az xəbər verir ki, şəhid Emil İsgəndərov 1990-cı il avqustun 5-də Sumqayıt şəhərində anadan olub. Əslən Qubadlı rayonundan olan şəhid ailəli idi. 2 oğlu yadigar qalıb.
Azərbaycanın Daxili İşlər Nazirliyinin Daxili Qoşunlarının giziri olan Emil İsgəndərov 44 günlük Vətən müharibəsi zamanı Cəbrayılın, Füzulinin və Şuşanın azadlığı uğrunda gedən döyüşlərdə savaşıb. Noyabrın 7-də isə Şuşa döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.
Prezidenti İlham Əliyevin Sərəncamlarına əsasən, Emil İsgəndərov ölümündən sonra "Vətən uğrunda" və "Şuşanın azad olunmasına görə" medalları ilə təltif edilib.
Şəhid Elnur Allahverdizadə də 1995-ci ildə Sumqayıt şəhərində anadan olub. Əslən Zəngilan rayonundandır. Hərbi xidmətdən geri döndükdən sonra səs rejissoru kimi fəaliyyət göstərib. "Barama" və "Atılmışlar" serialları, bir çox reklam çarxlarının səs rejissoru olub. Xüsusilə, "Son iclas" bədii filminin bum operatoru, "Buğlama" komediya serialının səs operatoru olub və "Picmus production"un əməkdaşı olaraq çalışıb.
Azərbaycan Ordusunun əsgəri olan Elnur Allahverdizadə 44 günlük Vətən Müharibəsində Ağdamın və Xocavəndin azadlığı uğrunda gedən döyüşlərdə vuruşub. Elnur Allahverdizadə 7 noyabr 2020-ci ildə Ağcabədi rayonunun Yuxarı Qiyaməddinli kəndi istiqamətində döyüş tapşırığının yerinə yetirilməsi zamanı şəhid olub. 8 noyabr 2020-ci ildə isə Sumqayıt Şəhidlər Xiyabanında dəfn olunub.
Prezidenti İlham Əliyevin Sərəncamlarına əsasən, Elnur Allahverdizadə ölümündən sonra "Vətən uğrunda" , "Cəsur döyüşçü", "Xocavəndin azad olunmasına görə" medalları ilə təltif edilib.
