Bu gün Böyük Vətən müharibəsinin alman faşizmi üzərində qələbə çalmaqla başa çatmasından 77 il ötür.
Sumqayıt24 Böyük Vətən müharibəsi və İtaliya Xalq Müqavimət Hərəkatının iştirakçısı Şahbaba Məcidov haqqında məlumatı sizə təqdim edir:
Şahbaba Yaqub oğlu Məcidov 9 may 1920-ci ildə Şəki rayonunun Şin kəndində anadan olub. Orta təhsilini kənd məktəbində alıb, 1937-ci ildə isə Şəki şəhəri V.İ. Lenin adına Pedaqoji Texnikuma daxil olub. Texnikumun 3-cü kursunda oxuyarkən o, sovet ordusuna həqiqi hərbi xidmətə çağırılıb.
Məcidov Ukraynanın Sumsk vilayətinin Romnı şəhəri yaxınlığında gedən döyüşlərdə yaralanaraq əsir düşüb. Lakin 1944-cü ildə İtaliyanın Rovenna vilayətində hərbi əsir düşərgəsindən köçürülən zaman yolda qaçmağı bacarıb və partizanların sırasına qoşulub. 1944-1945-ci illərdə o, 28-ci Qaribaldi briqadasının 7-ci bölüyünün tərkibində vuruşub və “Franço” ləqəbi ilə tanınıb.
1945-ci ildən Şahbaba Məcidov İtaliya Kommunist Partiyasının üzvü olur. Birinci Dünya müharibəsi başa çatdıqdan sonra isə o, İtaliyanın Punta Marina kəndində ilk iri kooperativ yaradıb. 1955-ci ilədək Məcidov kooperativin sədri vəzifəsində çalışıb.
İtaliyada yaşadığı müddətdə Məcidov italiyalı partizan qız Tereza Kazadio ilə evlənib və onların Stella, İzabella və Şauro adlı uşaqları dünyaya gəlib. Məcidovun oğlu Şauro, onun vaxtilə vuruşduğu partizanlar qrupunun həlak olmuş komandirinin adını daşıyırdı.
1955-ci ildə Şahbaba Şəkiyə qayıdıb, 1960-cı ildə isə Sumqayıta köçüb. 1963-cü ildə Məcidov ailəsi ilə İtaliyanı ziyarət edib. Səfər zamanı İtaliya Kommunist Partiyasının Revensk əyalət komitəsinin katibi, 28-ci Haribaldi briqadasının keçmiş komandiri Arriqo Boldrin Şahbaba Məcidova yüksək döyüş mükafatı olan “Haribaldi Ulduzu” ordenini təqdim edib.
Bundan əlavə, Şahbaba Məcidov "II dərəcəli Vətən müharibəsi" ordeni, "Almaniya üzərində qələbə", "İtaliyanın faşizmdən xilasının 20 illiyi", "Rovenna–Qaribaldi diviziyası", "İtaliya Kommunist Partiyası", "Rəşadətli Əməyə görə", "Əmək veteranı" və s. medalları ilə təltif olunub.
Şahbaba Məcidovun şəxsi əşyaları Sumqayıtın Tarixi muzeyində saxlanılır.
Ədəbiyyat:
