İkinci Dünya müharibəsindən sonra Sumqayıtda işə düşən yeni zavodlar və sənaye obyektləri bir sıra ölkələrin diqqətini cəlb edib. XX əsrin ortalarında Sumqayıt şəhəri xarici ölkələrlə əlaqələrini genişləndirməyə başlayıb.
Sovet dövründə xarici əlaqələrlə bağlı müəyyən məhdudiyyətlər var idi. Buna baxmayaraq, ildən-ilə, Sumqayıtın Almaniya, Avstriya, İtaliya, Rumıniya, Polşa, Çexoslovakiya (indiki Çexiya və Slovakiya), Hindistan, İndoneziya, Çin, Kuba, Misir, Yəmən, Əlcəzair, Somali, Sudan, Suriya və s. ölkələrlə texniki-iqtisadi əlaqələri genişlənirdi.
1950-ci illərdə Sumqayıtın Sintetik Kauçuk zavodunda Çindən gəlmiş mühəndis və texniki işçilər təcrübə keçirdilər. 1960-cı illərdə Sumqayıt mütəxəssisləri Hindistanın Bhilai Metallurgiya zavodunun tikintisinə yollanmışdılar. Onların əməyini Hindistanın sabiq prezidenti Racandra Prasad yüksək qiymətləndirmişdi. Həmin illərdə Sumqayıt Boru-Yayma zavodunun işçiləri Çində Anşan Metallurgiya zavodunun tikintisində və Fuşin şəhərində Alüminium Kombinatının inşasında iştirak edirdilər.
Sumqayıt bir neçə ölkənin şəhərləri ilə qardaşlıq əlaqələri qurmağı bacarmışdı. Bu siyahıda Lüdviqshafen (Almaniya), Piteşti (Rumıniya), Çju Cou (Çin), Lins (Avstriya), Genuya və Bari (İtaliya), Ceyhan (Türkiyə), Mogilyov (Belarus Respublikası), Belostok (Polşa), Rustavi (Gürcüstan), Aktau (Qazaxıstan), Cerkassı (Ukrayna), Nevinnomıssk (Rusiya Federasiyası) şəhərləri var.
Sumqayıt şəhərində Çerkassı şəhərinin adını daşıyan küçə və Lüdviqshafen şəhərinin adını daşıyan park mövcuddur. Bu şəhərlərdə də Sumqayıtın adını daşıyan küçələr var.
Ədəbiyyat:
