“Sumqayıt” futbol klubunda “soyuq müharibə”nin getdiyi iddia olunur.
Sumqayıt24 xəbər verir ki, bəzi xəbər portallarında komandanın prezidenti Riad Rəfiyevlə baş məşqçi Samir Abasovun küsülü olduğu, aralarında klubda qalmaq uğrunda mübarizənin getdiyinə dair məlumatlar yayılıb.
Bildirilir ki, Abasovun klub prezidentinin xəbəri olmadan sponsorlarla görüş keçirməsi münasibətləri bir qədər də gərginləşdirib. İddiaya görə, baş məşqçi Rəfiyevin qovulacağı barədə xəbər aldığı üçün daha da rahat hərəkət etməyə başlayıb.
Həmçinin məlumatlarda deyilir ki, klubu tərk edən xarici legioner Slavişa Radoviç də bu qarşıdurmanın qurbanıdır. Serbiyalı müdafiəçi iki ay öncə Abasovun israrı ilə transfer edilib. Lakin baş məşqçinin ümidini doğrultmadığına görə vaxtını əsasən ehtiyat oyunçular skamyasında keçirib. Nəticədə Rəfiyev Radoviçlə vidalaşmağı lazım bilib.
Slavişanın yerinə müqavilə imzalanan Miloş Miloviçin isə birbaşa menecer-prezidentin seçimi olduğu iddia edilir. Məşqçi isə 29 yaşlı monteneqroludan da məmnul deyil.
“Sumqayıt” klubu redaksiyamıza yayılan məlumatları təkzib edib. Komandanın mətbuat katibi Zaur Xudiyev hər kəsi şayiələrə inanmamağa, rəsmi xəbərlərə etibar etməyə çağırıb.
