Şəhərimizin yeganə futbol klubu olan “Sumqayıt” 2010-cu ildə yaranıb. Bu müddət ərzində klubun baş məşqçisi vəzifəsini bir neçə yerli və xarici mütəxəssis icra edib. Oktyabr ayından isə klubun sükanı Azərbaycan millisinin sabiq futbolçusu Vaqif Cavadova həvalə olunub.
Sumqayit24.az-ın əməkdaşı Vaqif Cavadovla "Sumqayıt”dakı son durumdan, qarşıdakı məqsədlərindən və digər məsələlərdən danışıb.
Müsahibəni təqdim edirik:
Komandanın hazırkı vəziyyətini necə qiymətləndirirsiniz və qüvvətləndirmə planları varmı?
Hazırda futbolçuların fiziki durumunu və oyun səviyyəsini yaxşılaşdırmaq istiqamətində çalışırıq. Məqsədimiz yaxşı nəticə əldə etməkdir.
Bu mövsüm üçün qarşınıza hansı məqsədləri qoyursunuz?
Qarşımızda məqsədimiz hər oyunda müsbət nəticə əldə etməkdir. Bu yöndə pillə-pillə irəliləməyə səy göstəririk.
Sizcə, klubun ən güclü tərəfləri hansılardır və onları daha da inkişaf etdirmək olarmı?
Klubda futbolçular və məşqçilərin inkişafı üçün gözəl şərait yaradılıb. Bu imkanlardan düzgün istifadə edərək hər oyuna maksimum səviyyədə hazır olmalıyıq.
Komandanıza hansı oyun tərzini aşılamaq istəyirsiniz?
Komanda son iki oyunda hücum futbolu nümayiş etdirdi. Hər rəqibə qarşı bunu tətbiq etmək çətindir, amma öz oyunumuza və strategiyamıza bu yöndə fokuslanmağa çalışırıq.
Keçmiş futbolçu təcrübəniz məşqçilik üslubunuza və taktikanıza necə təsir edir?
Futbolçu kimi hücuma yönəlmiş oyunçu olmuşam və komandamı bu istiqamətdə hazırlamaq istəyirəm, amma müdafiənin də əhəmiyyəti çoxdur. Meydançadakı hər bir futbolçu vacibdir. Sadəcə oyunçularımız verilən tapşırıqları icra etməlidirlər.
Gənc futbolçularla işləməyə necə yanaşırsınız? Onları əsas heyətə cəlb etməyi düşünürsünüzmü?
Gənc futbolçulara şans vermək vacibdir və bunu gələcəkdə də görəcəyik. Hazırda birinci komandada gənc futbolçularımız var. Onlar dərk etməlidirlər ki, akademiyada hər futbolçunun birinci komandaya yolu açıqdır. Onlardan çox şey asılıdır. Bunun üçün əzmkarlıq və təcrübə göstərilməlidir.
Komanda ruhu və oyunçular arasında qarşılıqlı əlaqə üzərində necə işləyəcəksiniz?
Komanda 7-ci pillədə idi. Onları psixoloji cəhətdən hazırlamaq məşqçinin əsas işidir. İnanıram ki, bu problemi yavaş-yavaş aradan qaldıracağıq. Qələbələrimiz artdıqca, bu çətinliklər də azalacaq. Futbolçular özlərinə inanmalı və məşqdə, oyunda var gücləri ilə çalışmalıdırlar ki, heç bir problem yaşanmasın.
Oyunu təhlil etmək və matçlara hazırlaşmaq üçün hansı üsullardan istifadə edirsiniz?
Oyunları təhlil etmək üçün müasir texnologiya və proqramlardan istifadə edirik. Komandaya ən yaxşı şəkildə bunu izah edirik. Əlbəttə ki, izahdan çox şey asılı olsa da, meydanda onlardır və futbolçular necə oyuna hazır olacaqlarsa, oyun da elə alınacaq.
İşin başlanğıcında həmişə mövcud olan təzyiq və gözləntilərin öhdəsindən necə gəlirsiniz?
Təzyiqlər hər zaman var. Bu normaldır. Ən əsası odur ki, öz işinə, öz planına sadiq qalasan. Təzyiq olan yerdə, düzgün rəqabət olan yerdə inkişaf da olacaq.
Azarkeş dəstəyi sizin üçün nə dərəcədə vacibdir və klubun azarkeşlərinə bir mesajınız varmı?
Azarkeşlərin və medianın dəstəyi hər futbolçuya və komandaya çox vacibdir. Onların tribunada olması futbolçuları ruhlandırır. Azarkeş sayı artdıqca, futbolçular oyuna daha ciddi hazırlaşacaqlar. Dəstəkləri həmişə bizim üçün önəmlidir. İstəyirəm ki, hər zaman komandamızın yanında olsunlar. Azarkeşlərə demək istəyirəm ki, hər şey yaxşı olacaq.
