Şəhərimizi təmsil edən "Sumqayıt" futbol klubu 2010-cu ildə yaranıb.
Həmin mövsüm I divizionun çempionu kimi “Abşeron” komandası Premyer Liqaya vəsiqə qazansa da, maliyyə problemləri ilə əlaqədar iştirakdan imtina edir. Bu zaman meydana 3-cü yeri tutan “Sumqayıt” çıxır.
PFL rəhbərliyi klubun maliyyə stabilliyini və güclülər dəstəsində iştirak etməsi ilə bağlı müraciətini müsbət qarşılayır. “Sumqayıt Şəhər” yeni mövsümü yüksək liqada açmağı planlaşdırır. Klub maliyyə məsələlərinin həlli üçün "Azərkimya" İB ilə sponsorluq müqaviləsi imzalayır. Müşahidə Şurasının qərarı ilə 2018-ci ildən etibarən komandanın prezidenti Riad Rəfiyev təyin olunur.
“Sumqayıt” ilk avrokubok təcrübəsini Ayxan Abbasovun başçılığı altında 2020-ci ildə qazanır. UEFA Avropa Liqasında klubumuz Şimali Makedoniyanın "Şkendiya"sı ilə qarşılaşır, lakin, əfsuslar olsun ki, I təsnifat mərhələsini adlaya bilmir.
Növbəti mövsüm Avropa Konfrans Liqasında mübarizəyə başlayan “Sumqayıt” 2-ci təsnifat mərhələsində Serbiyanın “Çukariçki” komandasına məğlub olur.
Kollektivə Ayxan Abbasov, Aleksey Baqa kimi mütəxəssislər başçılıq ediblər. Hazırda isə klubu təcrübəli məşqçi Samir Abasov çalışdırır.
Qeyd edək ki, “kimyaçılar”ın ən böyük hesablı qələbəsi (5:0) “Səbail” ilə oyuna təsadüf edib.
