Bu gün Azərbaycan Respublikası Milli Paralimpiya Komitəsinin vitse-prezidenti, ikiqat paralimpiya çempionu İlham Zəkiyevin yaralandığı gündür.
Xatırladaq ki, o 1999-cu ilin fevralında 4-də Füzuli rayonunun Aşağı Əbdürrəhmanlı kəndi istiqamətində döyüş tapşırığını yerinə yetirən zaman Ermənistan tərəfindən atılan snayper gülləsinə tuş gəlib. Güllə onun sağ gicgahından girib, sol gicgahından çıxıb. O, beş gün koma vəziyyətində qalıb və həkimlər onun öləcəyini bildiriblər.
Beşinci gün İlham rayon xəstəxanasında anasının səsini eşidib və özünə gəlib. Lakin gözlərini açanda, heç nə görməyib. Güllə yarasından görmə qabiliyyətini itirib. O, 2002-ci il noyabr ayının 1-dən məşqlərə başlayır. İlham Zəkiyev Azərbaycandan Paralimpiya Oyunlarında iştirak edən yeganə cüdoçu olur.
2007-ci ildə Bakıda keçirilən dünya çempionatında yenə də qalib olur. Həmin ildə Braziliyada keçirilən Ümumdünya yarışında qızıl medala layiq görülür. 2008-ci ildə ikinci Paralimpiya Oyunlarında iştirakı zamanı Çinin paytaxtı Pekində fransalı idmançı Julyen Turini beş saniyəyə məğlub edir.
Sumqayit24.az -ın əməkdaşı Milli Paralimpiya Komitəsinin vitse-prezidenti İlham Zəkiyev ilə söhbətləşib.
O, həmin gün ilə bağlı xatirələrini bölüşüb:
“Döyüşdə çox ağır yaralandım. Beş gün sonra hospitalda ayıldım. Çox qəribə hislər idi. O anlar hər zaman yaddaşımızda xatirə olaraq qalacaq. Həmin gün yanımda olan döyüş yoldaşlarım indi yoxdur. Bu çox ağırdır.
Bəzi şeylər var ki, danışmaq olmur. Hərbi sirr idi. Düşmənin gülləsinə tuş gəldim. Həkimlər dedilər ki, sağ qalmağın möcüzədir. Allahın böyüklüyünə şükürlər olsun. Ayaqda qalmağa çalışırıq. Çalışırıq ki, üçrəngli bayrağımız hər zaman zirvələrdə olsun. Qazilərimizə cansağlığı, şəhidlərimizə Allahdan rəhmət diləyirəm”.
İ.Zəkiyev ağır itkilərlə üzləşdiyini söyləyib:
“Mənim böyük qardaşım Telman ilk günlərdə yanım idi. Birinci Qarabağ Müharibəsində o da ayağından yaralınmışdı. Xəstəxanada da yanımda idi. 2012-ci ildə ürək çatışmazlığından dünyasını dəyişdi. Hər zaman mənə psixoloji dəstək olub. Onun itkisi çox ağır oldu. Daha sonra atam dünyasını dəyişdi. İtkilərim oldu. İllər ərzində çox şey dəyişdi. Düzdür, dəyişməyən məqamlar da var..”
Qeyd edək ki, İham Zəkiyev 2008-ci il dekabr ayının 26-da “Şöhrət” ordeninə, 2009-cu ilin mart ayının 5-də “Əməkdar idman ustası” adına, 2012-ci ildə “Tərəqqi” medalına layiq görülüb. 2012-ci il may ayının 10-da Heydər Əliyev Mərkəzinin açılışı zamanı Heydər Əliyev Fondunun təsis etdiyi “Qızıl çinar” beynəlxalq mükafatına layiq görülüb. 2016-cı ildə İlham Zəkiyev “Azərbaycan Respublikası Prezidentinin fəxri diplomu” ilə təltif edilib.
Nəzrin Vahid
