“Sumqayıt”ın kapitanı Vurğun Hüseynov komandasının Premyer Liqadakı çıxışı barədə danışıb. Sumqayıt24 bu barədə 26 oktyabr tarixində Report.az-a istinadən xəbər verir.
Onun sözlərinə görə, klubda legioner futbolçular olsa da, nəticələr ürəkaçan deyil: “Bizim çempionat çox çətindir, hər gələn burada baş çıxara bilmir. İnanıram ki, qarşıdakı turlarda onların ifasında daha yaxşı qarşılaşmalar görəcəyik. Hər görüş bizim üçün finala bərabərdir. Bacardığımız qədər yuxarı pillələrə qalxmaq istəyirik".
Təcrübəli müdafiəçi "Zirə"yə 0:2 hesabı ilə uduzduqları matçdan da söz açıb: “Oyuna yaxşı hazırlaşmışdıq. İstəyimiz evdə qələbə qazanmaq idi. Ani diqqətsizlikdən qapımızda qollar gördük və məğlub olduq”.
Vurğun Hüseynov səhvlərin üzərində işlədiklərini və “Sumqayıt”ın növbəti görüşlərdə daha baxımlı futbol sərgiləyəcəyini bildirib.
