Karate üzrə beşqat dünya, 12 qat Avropa çempionu, Olimpiya ikincisi, "Qara brilyant" Rafael Ağayev 40 yaşını qeyd edir.
Ağayev Rafael Mahir oğlu 4 mart 1985-ci ildə Sumqayıt şəhərində anadan olub. O, atasının yolu ilə gedərək 7 yaşından futbolla, eyni zamanda ilk məşqçisi Rafael Məmmədovun məktəbində karate ilə məşğul olmağa başlayıb.
İlk milli yarışlarda o, diqqəti cəlb edib və Füzuli Musayevin rəhbərliyi altında respublikanın ən məşhur idman klublarından biri "Budokan"a dəvət alıb.
İlk respublika çempionatında bütün rəqibləri üzərində inamlı qələbə qazanan Rafael Milli Karate Federasiyasının prezidenti Yaşar Bəşirovun diqqətini cəlb edə bilib.
O, beynəlxalq yarışlarda ilk dəfə olaraq milli yığma komandanın tərkibində 1997-ci ildə, Mişkolsda (Macarıstan) keçirilən açıq Dünya Kubokunda iştirak edib. Növbəti il idmançımız İngiltərənin açıq çempionatının qalibi olub və bundan sonra, heç bir yarışdan medalsız qayıtmayıb.
75 kiloqram çəki dərəcəsində karatenin kumite növü üzrə Rafael Ağayev 2015 Avropa Oyunlarında çempion adını qazanıb, Tokio-2020 Yay Olimpiya Oyunlarında isə gümüş medala layiq görülüb.
