Şahmat Federasiyasının “Qadın və Sosial Komissiyası”nın rəhbəri, qrosmeyster Zeynəb Məmmədyarova Zəngilan rayonunun Ağalı kəndində olub. Bu barədə 24 yanvar tarixində Sumqayıt24 xəbər verir.
O, burada Federasiyanın prezidenti Mahir Məmmədovun başçılığı və komissiya üzvləri ilə birlikdə ilin ilk sosial layihəsini həyata keçirib. Tədbirdə Şərqi Zəngəzur İqtisadi Rayonunda Bərpa, Tikinti və İdarəetmə xidmətinin icraçı direktoru Növrəs Cəfərov, “Sumqayıt” futbol klubunun Prezidenti Riad Rəfiyev və digər rəsmi şəxslər iştirak ediblər. Şahmat Federasiyası kənd məktəbinin hər bir şagirdinə (84 şagird) şahmat və şahmat üçün dərslik kitabları hədiyyə edib.
“Sumqayıt”ın Prezidenti Riad Rəfiyev Ağalı kənd sakinlərinə böyük park şahmatı, eyni zamanda klub tərəfindən şagirdlərə futbol geyimləri (84 ədəd) və futbol topları hədiyyə edib.
Qeyd edək ki, tezliklə Ağalı kənd məktəbinin şagirdlərinə "Məmmədyarovlar Şahmat Məktəbi"nin müəllim kollektivi tərəfindən onlayn şahmat dərsləri keçirilməyə başlayacaq.
Bununla yanaşı, 2023-cü ilin yekununda şahmat dərslərinə qoşulan şagirdlər üçün Zəngilanda canlı sınaq yarışması təşkil olunacaq.
