“Sumqayıt”la oyunda qələbə qazanmaq üçün əlimizdən gələni edəcəyik.
Report.az-ın məlumatına görə, bunu “Quba”nın gürcüstanlı basketbolçusu Levan Qoqaladze klubun mətbuat xidmətinə verdiyi açıqlamada deyib. O, Azərbaycan Basketbol Liqasının XIV turunda qarşılaşacaqları “Sumqayıt”la matça hazırlıq barədə danışıb.
İdmançı bundan öncəki bəzi görüşlərdə şanssızlıq səbəbindən məğlub olduqlarını vurğulayıb:
“Təəssüf ki, son görüşdə də uduzduq. Həmin oyundan sonra da hazırlığı davam etdirmişik. Qələbə qazanmağa yaxın olduğumuz görüşləri şanssızlıqla uduzmuşuq. Təbii ki, daha yaxşı olmaq üçün çalışırıq, bu barədə düşünürük”.
L.Qoqaladze meydançanın hər qarışı uğrunda mübarizə aparacaqlarını söyləyib:
“Bu gün “Sumqayıt”la qarşılaşacağıq. Qələbə qazanmaq üçün əlimizdən gələni edəcəyik. “Sumqayıt”la bu mövsüm ümumi hesabımız 1:1-dir. Ona görə də meydanın hər qarışı uğrunda mübarizə aparacağıq. Ümidvaram ki, istəyimiz reallaşar”.
Qeyd edək ki, “Quba” - “Sumqayıt” matçı “Sərhədçi” İdman Mərkəzində, saat 19:00-da başlayacaq.
