“Sumqayıt” FK-nın prezidenti Riad Rəfiyevin jurnalistləri prokurorluğa şikayət etməsi ilə bağlı klub açıqlama verib.
Sumqayit24.az-ın sorğusuna cavab olaraq “Sumqayıt” FK-nın mətbuat xidmətindən verilən məlumata görə, barəsində şikayət olunmuş jurnalistlər əməkdaşlıq və qarşılıqlı iş birliyi üçün “Sumqayıt” Futbol Klubuna müraciət etmiş, onların istəkləri ilə klubumuzun strategiyası uyğun olmadığı üçün bu təklif klub tərəfindən rədd edilib:
“Sonra isə həmin jurnalistlər tərəfindən klub Prezidenti Riad Rəfiyev barəsində mütəmadi olaraq, yalan, şər-böhtan xarakterli məlumatlar yazılır və tirajlanır.
Riad Rəfiyevin şəxsi və işgüzar nüfuzuna, şərəf və ləyaqətinə, Sumqayıt Futbol Klubunun peşəkar fəaliyyətinə zərər vermək məqsədilə mütəmadi olaraq yazılan şər-böhtan xarakterli məlumatlar hüquq-mühafizə orqanlarına təqdim edilib. Bundan sonra iş müvafiq orqanların nəzarətindədir. Əminik ki, hüquq-mühafizə orqanları işə ədalətli və düzgün qiymət verəcəklər”.
Fidan İlqar
