“Sumqayıt” Futbol Akademiyasında seçim günləri başa çatıb. Sumqayıt24 bu haqda 13 iyun tarixində xəbər verir.
8-10 iyun tarixlərində keçirilmiş seleksiya ümumilikdə 10 yaş qrupunu əhatə edib. Akademiyanın direktoru Hakan Sünal seçimlərlə bağlı fikirlərini bölüşüb:
“Öncə onu qeyd edim ki, artıq 3 ildir çempionatlar başa çatdıqdan sonra akademiyamıza seçimlər keçirilir. İlk seleksiyamızda iştirak etmiş uşaqların toplam sayı 360 nəfər idi. Növbəti ildə həmin say ilk seçim günündəcə təkrarlanmış, ümumi say isə 2 dəfə çoxalmışdı”.
Direktor cari il sözün yaxşı mənasında şoka düşdüklərini bildirib:
“Seçimlərin təkcə birinci günündə 1000-ə yaxın uşaq iştirak etmişdi. Təbii ki, bunun da səbəbləri var. Çünki 2009-2010 təvəllüdlülər bu il keçid dövründədirlər və çempionatda çıxış edəcək komanda sayı azalır deyə uşaqlar futbolda qalmaq üçün özlərini göstərməyə çalışdılar. Sonrakı günləri də nəzərə alsaq, bu il ümumilikdə 1500-ə yaxın uşaq seçimlərdə iştirak edib”.
Az öncə qeyd olunan rəqəmlərə də diqqət etsək, görərik ki, qatılma sayında 5 dəfəyə qədər artım var. Builki seleksiyada 80 nəfər adını ikinci mərhələyə yazdırıb. Seçimlərin ikinci mərhələsi avqust ayında, yeni mövsümə hazırlıq zamanı keçiriləcək.
Məlumata görə, Azərbaycanın müxtəlif bölgələrindən – Xızı, Zaqatala, Lənkəran və digər rayonlardan da seleksiyalara qatılanlar var idi.
