“Sumqayıt” klubunun kapitanı Vüqar Mustafayev futbolçu karyerasını bitirib.
Teleqraf.az-ın məlumatına görə, bununla bağlı “kimyaçılar”ın üzvləri Azərbaycan Premyer Liqasının XXXV turunda evdə “Turan Tovuz”la oyundan öncə 31 yaşlı yarımmüdafiəçini mükafatlandırıblar.
“Sumqayıt”ın prezidenti Riaf Rəfiyev Mustafayevə xatirə lövhəsi təqdim edib.
Sumqayıt təmsilçisinin futbolçuları isə kapitana xüsusi hədiyyə veriblər. Hədiyyəni Elvin Bədəlovla Murad Xaçayev təqdim ediblər.
Qarşılaşmada topa ilk toxunuşu da Mustafayev edib.
Qeyd edək ki, Vüqar Mustafayev Mehdi Hüseynzadə adına Sumqayıt şəhər stadionunda təşkil olunan görüşdə cəza səbəbindən iştirak edə bilməyib. O, ötən tur "Kəpəz"lə matçın 89-cu dəqiqəsində baş vermiş münaqişə zamanı qırmızı vərəqə ilə cəzalandırılmışdı.
AFFA İntizam Komitəsi Mustafayevi təcavüzkar davranışa görə 2 oyun şərti olmaqla 4 oyun diskvalifikasiya edib.
Vüqar Mustafayev 2019-cu ildən "Sumqayıt"ın şərəfini qoruyur. O, Azərbaycan milli komandasının heyətində 11 oyunda iştirak edib.
