“Sumqayıt” klubu və sabiq məşqçisi Elnur Çodarov arasında ilk məhkəmə iclası keçirilib. Sumqayıt24 bu haqda Report.az-a istinadən xəbər verir.
İclas Beynəlxalq İdman Arbitraj Məhkəməsində (CAS) onlayn şəkildə 3 saat davam edib. Elnur Çodarov bildirib ki, CAS hər iki tərəfə qulaq assa da, heç bir qərar verilməyib:
“Qanuna əsasən, yekun qərar bundan sonra maksimum 4 ay ərzində verilməlidir. Bu, bir ay da çəkə bilər, dörd ay da. Dedilər ki, hər iki tərəfin təqdim etdiyi sənədlər yenidən araşdırılacaq və ondan sonra yekun söz deyiləcək. Yəqin ki, nəticəni elektron məktub vasitəsilə göndərəcəklər”.
“Turan Tovuz”da baş məşqçi Ayxan Abbasovun köməkçisi Çodarov məhkəməni qazanarsa, 4 aylıq maaşı ilə yanaşı, əlavə xərcləri də “Sumqayıt” klubu tərəfindən qarşılanacaq:
“Tələbim 4 aylıq maaşımın verilməsidir. Həmçinin əlavə pul ödəmişəm. CAS-a müraciət eləmək əlavə xərc tələb edir. Tərcüməçi pulu, sənədlərin tərcümə olunması, yığılması üçün vəsait lazımdır. Əgər məhkəməni udsam, “Sumqayıt” 4 aylıq maaşımla bərabər, bu pulu da ödəyəcək”.
Qeyd edək ki, Elnur Çodarov 2021-ci ilin dekabrında “Sumqayıt”da istefaya göndərilən məşqçilər korpusunda yer alıb. Onun “gənclik şəhəri” təmsilçisi ilə müqaviləsinin davam etməsinə baxmayaraq, rəhbərlik birtərəfli şəkildə sözləşməyə xitam verib. AFFA-nın Oyunçuların Statusu və Transferi Komitəsi 2022-ci il martın 17-də onu haqlı saysa da, bununla razılaşmayan “Sumqayıt”ın şikayəti bir ay sonra Apellyasiya Arbitraj Tribunalı tərəfindən təmin olunub.
