“Sumqayıt”ın basketbolçusu Murad Orucəliyev klubun mətbuat xidmətinə açıqlama verib.
Sumqayit24.az xəbər verir ki, basketbolçu əvvəlcə komandanın ilk 3 oyunda məğlubiyyətinin səbəblərindən danışıb: “Fikrimcə, biz bu oyunlara tam hazır deyildik. Məsələn, “Lənkəran”la matça yaxşı başladıq, uzun müddət hesabda öndə olduq, amma üstünlüyümüzü qoruya bilmədik. Ümid edirəm ki, yeni oyunçularımızın gəlişi ilə daha komplektləşəcəyik”.
Murad ötən mövsümlə hazırkı mövsümü müqayisə edərkən aradakı fərqdən söz açıb: “Doğrudur, ötən “basketbol ili”ndə hədəflərimizə çata bilməsək də, oyun planında anlaşma var idi. Səhvlərimizdən nəticə çıxarmağı bacarırdıq. İndi isə bunu görmürük. Amma bu problemi qaydaya salmaq olar. Fikrimcə, zamanla hər şey yaxşı olacaq. Pley-offa vəsiqə qazanmaq üçün əlimizdən gələni etməliyik.”
Orucəliyev B qrupundakı rəqib komandalar barədə də fikirlərini bölüşüb: “Hazırda “Gəncə” daha yaxşı çıxış edir. “Ordu” haqqında da xoş fikirlər səsləndirmək olar. Amma onları məğlub etmək şansımız var. “Lənkəran” barədə danışdım. Qələbə qazanmağa yaxın olduğumuz oyunu əldən verdik. Sabah “Quba” ilə qarşılaşırıq. Onları məğlub etməliyik!”
