Azərbaycanda yüksəksəviyyəli futbolçu yetişmir. Klubların aşağı yaş qruplarından ibarət komandalarında gələcək vəd edən futbolçuları daha sonra böyük klubların heyətində görmək mümkün olmur. İllər boyunca inkişaf yolunda müəyyən addımlar atılsa da, hələ ki ciddi dəyişiklik nəzərə çarpmır.
Report problemin səbəblərini aydınlaşdırmaq üçün “Sumqayıt” Futbol Akademiyasının rəhbərinə - koordinatora müraciət edib. Fəxrəddin Həsənovun sözlərinə görə, Azərbaycanda dünya səviyyəli oyunçu yoxdur:
"Əslində, çox yaxşı və geniş mövzuya toxunmusunuz. Bu barədə saatlarla müzakirə aparmaq olar. Gəlin, əvvəlcə dəqiqləşdirək ki, yüksəksəviyyəli oyunçu deyəndə kimi nəzərdə tuturuq? Söhbət dünya səviyyəli oyunçudan gedirsə, belələri Azərbaycanda, ümumiyyətlə, yoxdur. Amma söhbət Azərbaycan səviyyəsində futbolçulardan gedirsə, bu gün Premyer Liqanın bir neçə klubunda, həmçinin "Sumqayıt"ın özündə çıxış edən oyunçular var ki, onlar sırf "Sumqayıt" Futbol Akademiyasının yetirmələridir. Bunlara nümunə olaraq hazırda "Turan Tovuz"da çıxış edən Tural Bayramlı və Xəyal Nəcəfovu, "Araz-Naxçıvan"dan Bəxtiyar Həsənalızadəni, "Səbail"də çıxış edən Süleyman Əhmədov və Rüfət Abdullazadəni, öz komandamızın üzvləri Səbuhi Abdullazadə, Nihat Əhmədzadə, Sənan Muradlı, Xəyal Fərzullayevi misal göstərmək olar.
Ümumiyyətlə, bir uşağın futbolçu kimi yetişməsi üçün onun bütün həyat tərzi, ətrafı, ailəsi, dostları, həyatı bu yöndə inkişaf etməlidir. Sadəcə, gəldim, 2 saat məşq etdim, getdim deməklə futbolçu olmaq mümkün deyil. Fikir verirsinizsə, aşağı yaş qruplarında, məsələn, 16-17 yaşa qədər müəyyən qədər istedadlı oyunçular nəzərə çarpsa da, sonrakı inkişaf prosesində onların çoxu gözdən itirlər. Bunun səbəbi də yuxarıda sadaladığım faktorlardır. Yeməyindən tutmuş yuxusuna, gündəlik həyat ritmindən tutmuş vərdişlərinə, ətrafındakı dostlarından tutmuş ailəsinə qədər bir çox faktorlar bunda həlledici rol oynayır.
Uzun sözün qısası, "Sumqayıt" Futbol Akademiyası olaraq mümkün qədər çalışırıq ki, bizim müxtəlif yaş qruplarında məşq edən uşaqları, yeniyetmələri, gəncləri layiqli oyunçular kimi Azərbaycan futboluna bəxş edək".
