Sumqayıtlı şahmatçı Vasif Durarbəyli ölkəni birdəfəlik tərk edib. Sumqayıt24 bu haqda 25 fevral tarixində xəbər verir.
Belə ki, dünən 31 yaşını qeyd edən qrosmeyster sosial şəbəkə hesabında izləyiciləri ilə ABŞ-yə köçdüyünü bölüşüb:
"Həyatımın yeni fəslinin başlanması doğum günümə təsadüf etdi.
Bundan öncə, 2014-cü ildə təhsillə bağlı Sent-Louisə yollanmış və 2019-da bəzi məqsədlərimi icra etmək üçün dönmüşdüm. 5 ildəki təcrübələrimin məni bir fərd kimi yaxşıya doğru dəyişdiyi qənaətindəyəm. Görək bu dəfə məni həyat nələrlə qarşılaşdıracaq və öyrədəcək!
Ötən dəfədən fərqli olaraq, Azərbaycana məskunlaşma üçün qayıdacağıma əmin deyiləm. İstənilən halda məni sevənlərin və sevməyənlərin narahat olmasına ehtiyac yoxdur. Bir ayağım burada olacaq”.
Qeyd edək ki, Vasif Durarbəyli son Azərbaycan çempionatının qalibidir.
