Bir neçə gün əvvəl sumqayıtlı veteran futbolçu Kamal Quliyevin xəstəxanadan çıxdığı bildirilmişdi. Lakin Futbolinfo.az-ın əldə etdiyi məlumata görə, sabiq yarımmüdafiəçinin vəziyyəti düşünüləndən daha ağırdır və o, müalicəni ev şəraitində davam etdirməyə məcburdur. Bunun səbəbi isə maliyyə imkanlarının məhdud olmasıdır.
Quliyevin sözlərinə görə, onun qaraciyərində ciddi problem var və orqan demək olar ki, sıradan çıxıb. Analizlərin nəticələri ağır vəziyyəti təsdiqləyir. Həkimlər qaraciyər transplantasiyasının mümkün olduğunu bildiriblər. Müalicə və əməliyyat üçün ümumilikdə 40 min manat tələb olunur.
Veteran futbolçu bu çətin günlərində bir sıra həmkarlarının ona dəstək göstərdiyini qeyd edib. Ramiz Məmmədov, Arif Əsədov, Rəşad Abdullayev, Kənan Kərimov, Ruslan Emircanov, İlham Yadullayev, Vadim Vasilyev, Nəcməddin Musayev, Mirhüseyn Vəfadar, Azər Məmmədov, Vitali Kavalyov və Zaur İsmayılov veteran futbolçunun yanında olduqlarını göstəriblər.
AFFA-nın hazırkı vəziyyətlə bağlı məlumatlı olub-olmadığı dəqiq bilinmir, lakin Quliyev müraciət etməyi planlaşdırdığını deyib. O, həmçinin uzun illər formasını geyindiyi "Neftçi"dən də dəstək gözlədiyini bildirib. Quliyev xatırladıb ki, kluba həm futbolçu, həm də məşqçi kimi böyük xidmətlər göstərib və çətin vaxtlarında belə komandanı tərk etməyib.
Veteran futbolçu hazırkı durumunun onu mənəvi olaraq da çətin vəziyyətə saldığını bildirir. O, illərlə meydanda mübarizə apardığını, ancaq bu gün xəstəliklə mübarizə aparmağa güc tapmadığını deyib.
