“Sumqayıt”ın baş məşqçisi mətbuat konfransı keçirib. Sumqayıt24 bu haqda 31 iyul tarixində xəbər verir.
Samir Abasov "Fehervar"la oyun öncəsi fikirlərini bildirib:
"Matçın çətinliyi haqda nəsə demək şablon çıxacaq. Rəqibin çempionatda keçirdiyi oyunu da izləmişik. Ümid edirəm ki, maraqlı qarşılaşma olacaq – Sumqayıtdakı kimi. İstəyirəm ki, oyun bu dəfə də hakimlərin səhvi ilə yadda qalmasın. Bura yaxşı motivasiya ilə gəlmişik. Yetərincə itkilərimiz var. Əhvalımız yaxşıdır, nə etmək lazım olduğunu bilirik. Uşaqlar da bunu anlayır. İtkilər, heyətdəki çatışmazlıqları kənara atmışıq və yaxşı ümidlərlə gəlmişik. Arenada yaxşı atmosfer olacağını gözləyirəm. Ümid edirəm, bunu öz təcrübəmizə, xeyrimizə çevirə biləcəyik.
Hesab bəllidir, itirəcəyimiz nəsə yoxdur. Hələ heç nə bitməyib. Oyuna çox ümidliyəm və futbolçularıma inanıram. Bu yöndə uşaqları kökləməyə çalışacağam.
Sumqayıt sakinləri arasında mərhələni keçməyimizə inananlar da az deyil. Bu, məni əlavə motivasiya edir. Bizə bu qədər şans verirlərsə, deməli, inanırlar. Bunu futbolçulara da çatdıracam. Deməli, gücümüzə inanırlar, dəstəklərini əsirgəmirlər. Şanslar bərabərdir, bizə inananlar da sağ olsunlar".
“Sumqayıt" klubunun yarımmüdafiəçisi Rövlan Muradov da yaxşı nəticə qazanacaqlarına inandığını bildirib:
"Məğlub olduğumuz oyun keçmişdə qaldı. Əlimizdən gələnin ən yaxşısını ortaya qoymalıyıq. İnanırıq ki, yaxşı nəticə qazana biləcəyik. Baxmayaraq ki, ağır oyun olacaq. Yaxşı nəticə qazanmağa çalışacağıq. İnam qələbənin yarısıdır. Komanda yoldaşlarıma bildirəcəyəm ki, hər kəs bizə inanır. Ümidvaram ki, sevinən tərəf biz olacağıq".
Qeyd edək ki, komandalar bu gün saat 21:00-da UEFA Konfrans Liqasının 2-ci təsnifat mərhələsi çərçivəsində Macarıstanda qarşılaşacaqlar. Keçən həftə şəhərimizdə keçirilən matç rəqibin 2:1 hesablı qələbəsi ilə başa çatmışdı.
