Anasının tanışını öldürən şəxs barəsindəki 18 illik həbs hökmündən narazıdır. Sumqayıt24 bu haqda 13 yanvar tarixində Pravda.az-a istinadən xəbər verir.
Hadisə 27 iyul 2022-ci ildə Sumqayıt Dəmiryol Vağzalının qarşısında baş verib. 20 yaşlı Sumqayıt sakini Rafael Quliyev 29 yaşlı həmşəhərlisi Nurəddin Quliyevi bıçaqlayaraq qətlə yetirib.
Rafael Quliyev polis əməkdaşları tərəfindən tutularaq istintaqa cəlb edilib. Onun barəsində Cinayət Məcəlləsinin “xüsusi amansızlıqla və ya ümumi təhlükəli üsulla adam öldürmə” və “Qanunsuz olaraq soyuq silah gəzdirmə” maddələri ilə ittiham irəli sürülüb. Məhkəmədə o, özünü təqsirli bilməyib.
O, ifadəsində göstərib ki, zərərçəkmiş şəxsin onun anası ilə münasibəti olub:
“2018-ci ildə anamın Nurəddinlə münasibətdə olduğunu öyrəndim. Mən də bu münasibətə son qoymağı tələb etmək üçün onunla görüşdüm. Hadisə günü evə getdiyim zaman anamı pis halda gördüm. O, mənə hadisənin necə olduğunu danışdı. Bundan sonra Nurəddinlə görüşmək üçün vaxt təyin etdim. Nurəddinin məndən güclü olduğunu bildiyim üçün ehtiyat məqsədilə üzərimdə bıçaq götürmüşdüm. Mərhum avtomobili ilə məni “Qayalı” marketin qarşısından götürdü. Ona bizi bir daha narahat etməməsini dedim. Biz birlikdə Sumqayıt Dəmiryol Vağzalının qarşısına gəldik. Və avtomobildən endik. Mən onun xəbəri olmadan maşında olan mavi rəngli beşbarmağı götürərək cibimə qoydum. O, məni təhqir etdi və bibər qazından istifadə etdi. Mən də beş barmaqla özümü müdafiə etdim. Nurəddin taqətdən düşdükdə ona bıçaq zərbəsi endirdim. Lakin neçə bıçaq zərbəsi endirdiyimi xatırlamıram. İstintaq zamanı ifadə verərkən həyəcanlı idim”.
Sumqayıt Apellyasiya Məhkəməsində əməli törətməkdə təqsirləndirilən Rafael Quliyev apellyasiya şikayəti verib. Ali Məhkəməyə müraciət edən məhkum cəzasının yüngülləşdirilməsini istəyir. Şikayət hakim Rəşadət Ağayevin sədrliyi ilə araşdırılır.
Növbəti proses fevralın 2-nə təyin edilib.
