Evinə girən oğrunu bıçaqlayan Sumqayıt sakininə hökm oxunub. Sumqayıt24 bu haqda 29 noyabr tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində ittiham olunan Ədalət Məmmədovun (şərti) işi üzrə məhkəmə istintaqı başa çatıb. Hakim Hafiz Əliyevin sədrliyi ilə keçrilən prosesdə ona 3 il müddətinə azadlığın məhdudlaşdırılması (elektron qolbaq) cəzası təyin edilib.
Hadisə Corat qəsəbəsində qeydə alınıb. 65 yaşlı Ədalət Məmmədov onun evinə oğurluğa girən Məhəmməd Həsənova (şərti) bıçaqla xəsarət yetirib.
Özünü təqsirli bilməyən Ədalət məhkəmədəki ifadəsində göstərib ki, 7 nömrəli məktəbdə gecə növbəsində gözətçi işləyir. Bu səbəbdən evdən çıxanda qapıya həmişə nişan vurur. Lakin hadisədən əvvəl evə gələndə görüb ki, nişan pozulub və nəvəsinin velosipedi yoxa çıxıb.
Növbəti günlərdə qapıya yeni nişan vursa da, onun yenidən pozulduğunu görüb. Məlum olub ki, evdə olan digər velosiped də oğurlanıb.
Bundan təsirlənən kişi 3 günlük ərizə yazaraq işdən icazə alıb ki, evə girən oğruları tapsın. Gecə düşdükdə qapını bu dəfə çöldən bağlayaraq gözləməyə başlayıb. Hadisə günü səhər saatlarında kiminsə siqaretin boş qutusunu tulladığını eşidib. Bu, növbəti dəfə oğurluğa gəlmiş onun tanışları Anar və Məhəmməd idi. Ədalət gizlənsə də, Məhəmməd onu görüb və üstünə gəlməyə başlayıb. Lakin soyuducunun üzərinə yıxılıb və qalxaraq qaçıb.
“Əgər mən kimisə bıçaqla vurmuş olsaydım, o, 2 kilometr yolu gedə bilməzdi”, - deyə Ədalət Məmmədov vurğulayıb.
