Sumqayıt son 15 gündə silsilə oğurluqlar edən şəxslər saxlanılıblar. Sumqayıt24 bu haqda 3 dekabr tarixində Daxili İşlər Nazirliyinə istinadən xəbər verir.
1-ci Polis Bölməsinin əməkdaşlarının keçirdikləri əməliyyat zamanı şəhər ərazisində marketlərdən, evlərdən, habelə avtomobillərdən oğurluqlar edən əvvəllər məhkum olunmuş Fərid Baxşıyev, Daşqın Salmanov və Fərid Qurbanov tutulublar. Bu şəxslərin Novxanı bağlar massivində 10-dan çox evdən kombi aparatları və digər məişət əşyaları oğurladıqları məlum olub.
Keçirilən digər əməliyyat nəticəsində, gecə saatlarında şüşələri qıraraq maşınların salonlarından və marketlərdən silsilə oğurluqlar edən Qabil Kərimov və Orxan Qurbanov da saxlanılıblar.
Baş tutan sonuncu əməliyyatda isə Sahil küçəsində evlərdən təmir-tikinti alətləri və dəmir ləvazimatlar oğurlayan Ruslan Qasımov, Roman İsmayılov və İbrahim Abdullayev tutulublar.
Toplanan materiallar Polis İdarəsinin İstintaq Şöbəsinə göndərilib. Saxlanılan şəxslər bərəsində cinayət işi açılıb.
