Novxanı qəsəbəsində oğurluq edən şəxs hadisə yerində tutulub. Sumqayıt24 bu haqda Daxili İşlər Nazirliyinin saytına istinadən xəbər verir.
Belə ki, dəfələrlə məhkumluq həyatı yaşamış paytaxt sakini Ramin Rzayev qəsəbədə xüsusi texniki vasitələrlə qorunan bağ evlərinin birindən oğurluq etməyə cəhd edib. Bu zaman, DİN-nin Baş Mühafizə İdarəsinə “həyəcan” siqnalı daxil olub. İdarənin əməkdaşları “siqnal” gələn ünvana yollanıblar.
Əraziyə keçirilən baxış zamanı, polis əməkdaşları Rzayevin evin naqillərini oğurlamasının şahidi olublar. Bu zaman, həmin şəxs evin hasarından tullanaraq qaçmaq istəyib, lakin əməkdaşlar tərəfindən saxlanılıb.
Qeyd edək ki, bağ evinin sahibi bir müddət əvvəl mənzilindən bəzi əşyaların oğurlandığını müşahidə etdikdən sonra hüquq-mühafizə orqanlarına müraciət edib.
Faktla bağlı araşdırmalar davam etdirilir.
