İctimai nəqliyyatda cibgirliklə məşğul olan Sumqayıt sakinləri tutulublar. Sumqayıt24 bu barədə 15 noyabr tarixində Daxili İşlər Nazirliyinə istinadən xəbər verir.
Polis əməkdaşlarının keçirdikləri əməliyyatlar nəticəsində Sumqayıt sakinləri, əvvəllər dəfələrlə məhkum olunmuş Elnur, Faiq və Ruslan Süleymanov qardaşları saxlanılaraq istintaqa təhvil veriliblər.
Araşdırmalar zamanı bu şəxslərin paytaxtın bir neçə rayonlarında müxtəlif marşrutlar üzrə hərəkət edən avtobuslarda sərnişinlərin ümumilikdə 6000 manatdan artıq pul, mobil telefon və qiymətli zinət əşyalarını talamaları müəyyən edilib.
Saxlanılan şəxslərin paytaxt ərazisində digər analoji cinayətlər etdiyi istisna olunmur. Onların əməllərindən zərər çəkən başqa vətəndaşlar varsa, bu barədə nazirliyin sosial şəbəkələrdəki rəsmi səhifələrinə, Bakı Şəhər Baş Polis İdarəsinə və "102" Xidməti Zəng Mərkəzinə məlumat verə bilərlər.
Aşkar edilmiş faktlarla bağlı araşdırmalar davam etdirilir.
